Pillars don crash kommot: Africa Champions League

Kano Pillars wey na dem be de current Naija Lig champions don take style crash kommot for de champions Lig afta AC Leopards nack dem 3 kondo for Congo on Sunday.

KANO-PILLARS-ACTION IMAGES-300

Na 4-1 na hin Kano Pillars flog AC Leopards for de fess leg in Kano bifor dem waka go Congo.

AC Leopards vex take gragra stat de match as dem wan score earli earli, but de defendas of Kano Pillars dey kampe as na soso clear dem dey clear all de shot wey dia enemies (AC Leopards) dey waya dem.

Drame Bine Arouna na hin be de guyman wey kon take hin head faya de fess gol for AC Leopards in de 30th minute and walahi, de gol na offside but de refiree say na correct gol.

De playas of Kano Pillars kon para for de refiree dat de gol na offside, but dia oga beg dem say make dem no worry and naso dem take carri on.

Kano Pillars take swagga stat de sekond half as dem take plenti plenti attack nack AC Leopards, but de refiree wey come from Ivory Coast (Doue Noumadiez) kon pour sand for dia garri as him carri penarity go give AC Leopards for de 56th minute and na Ntela Kalema be dia guyman wey score am.

Kano Pillars playas wan die wen dem score dem de sekond gol and dem too carri beta ball go attack AC Leopards bifor AC Leopards defenda, Nzamba Ulrich go jam Nasiru Ali and de refiree blow penarity but as Kano Pillars wan play de PK na hin de refiree say de ball no be penarity again.

De time kon remain 2 minute make de refiree blow hin final wisu and Kano Pillars playas don dey jolly dat dem don kwalify as na 2-0 na hin be de score den.

But de guyman wey score de fess gol (Drame Bine Arouna) kon faya de third gol for de final minute wey be anoda offside and naso de match take finish 3-0.

Minwile, Kano Pillars don dey para no be small as dem tok say dem no go gree acept de result as dem wan go report de wayo wey de refiree do dem to caf.

ÔÇ£Haba! Walahi, we no go gree for dis kind wayo wey de refiree and de officials do us, and we dey carrri de mata go meet Caf (na dem dey control futbol for Africa).

ÔÇØDem no allow our cameraman to work bicos of de wayo wey dem wan do us and I neva for my life see dat kind magomago bifor,ÔÇØ Naso de oga patapata for Kano Pillars, Abba Galadima yarn us for supersport.com afta de match for Congo

Kano Pillars playas wey jam AC Leopards

Afelokhai Theophilus, Alhaji Aljaji, Nasifi Amani, Umar Sango, Ikechukwu Gabriel, Mustapha Musa, Shehu Shagari, Nasiru Ali, Rabiu Ali, Gambo Mohammed, Nafiu Ibrahim.

Dos wey sit down for bench

Sani Haliru, Samuel Tsanya, Buhari Musa, Bello Kofarmata, Ado Ali, Manir Ubale.

Leopards playas wey jam Kano Pillars

Ngome Lawrence, Moubhio Boris, Miangounina Djodjo, Nzamba Ulrich, Makiesse Junior, Lakolo Preston, Drame Bine Arouna, Ngouelou Heritier, Ntela Kalema, Bhebey Ndey Guelord, Magnokele Dimitri.

Dos wey sit down for bench

Mouyabi Gildas, Kombo Bienvenu, Mfoutou Madila, Gandze Cesair, Eric Nyemba, Bakoua Carof, Nkodia Herman